បើកម៉ូតូមិនគោរពសិទ្ធិអាទិភាព ធ្វើឲ្យស្លាប់ក្មេងស្រីអាយុ៦ឆ្នាំម្នាក់
11-August-2016 | ដោយ មែន កំសត់
ខេត្តបន្ទាយមានជ័យ ៖ ក្មេងស្រីម្នាក់អាយុ៦ឆ្នាំ ត្រូវរងរបួសធ្ងន់ក្រោយមកបានស្លាប់នៅពេលដឹកទៅមន្ទីរពេទ្យ ដោយជួបគ្រោះថ្នាក់ចរាចរណ៍រវាងម៉ូតូបុកជាមួយគោយន្តកន្ត្រៃ។ ហេតុការណ៍គ្រោះថ្នាក់ចរាចរណ៍នេះ បានកើតឡើងនៅវេលាម៉ោងវេលាម៉ោង៦និង៣០នាទីព្រឹកថ្ងៃទី១០ ខែសីហា ឆ្នាំ២០១៦ នៅលើកំណាត់ផ្លូវលំ ដែលតភ្ជាប់នឹងផ្លូវជាតិលេខ១៥៦D ស្ថិតក្នុងភូមិស្ទឹងចាស់ ឃុំគយម៉ែង ស្រុកមង្គលបូរី ខេត្តបន្ទាយមានជ័យ។
តាមប្រភពព័ត៌មានពីមន្ត្រីនគរបាលចរាចរណ៍ផ្លូវគោក នៃអធិការដ្ឋាននគរបាលស្រុកមង្គលបូរីបានឲ្យដឹងថា ហេតុការណ៍គ្រោះថ្នាក់ចរាចរណ៍នេះ ដំបូងមានម៉ូតូ១គ្រឿងម៉ាកហុងដា ធុនសេ១២៥ ស៊េរី២០១៣ ពណ៌ខ្មៅ ពាក់ស្លាកលេខ ប.មានជ័យ 1A-3216 បើកបរដោយឈ្មោះ ស៊ីវ សាវ៉ុង ភេទស្រី អាយុ១៩ឆ្នាំ នៅភូមិស្ទឹងចាស់ ឃុំគយម៉ែង ស្រុកមង្គលបូរី ខេត្តបន្ទាយមានជ័យ បានឌុបក្មេងស្រីឈ្មោះ ផឹង លីសា ភេទស្រីអាយុ៦ឆ្នាំ នៅភូមិជាមូយគ្នា។
នគរបាលរូបនោះបានបញ្ជាក់ថា តាមសាក្សីឃើញហេតុការណ៍នោះ បានប្រាប់ថា មុនពេលកើតហេតុម៉ូតូបានបើកចេញពីផ្ទះ នៅខាងត្បូងផ្លូវ គោលបំណងបត់ស្តាំទៅកើត ដើម្បីឡើងផ្លូវស្រប ពេលនោះមានគោយន្តកន្ត្រៃដឹកទឹកកក១គ្រឿង ធ្វើដំណើរតាមបណ្តោយផ្លូវជាតិលេខ១៥៦D បើកបរក្នុងទិសដៅពីលិចទៅកើត ចុះចំណោតផ្លូវជាតិ ដែលបើកបរដោយឈ្មោះ ភិន ផុន អាយុ២៦ឆ្នាំ នៅភូមិថ្មី ឃុំគយម៉ែង ស្រុកមង្គលបូរី។
ពេលនោះម៉ូតូបានបើកទៅប៉ះនឹងជ្រុងទ្រុងរ៉ឺម៉កគោយន្ត បណ្តាលឲ្យម៉ូតូដួល ហើយក្មេងស្រីអាយុ៦ឆ្នាំ ធ្លាក់ទៅចូលកង់រ៉ឺម៉កគោយន្តខាងស្តាំកិនរងរបួសធ្ងន់ ត្រូវបានបញ្ជូនទៅព្យាបាលដល់មន្ទីរពេទ្យក៏បានស្លាប់។ អ្នកបើកម៉ូតូរងរបួសស្រាល។ ចំណែកអ្នកបើកបរគោយន្តកន្ត្រៃក្រោយពីកើតហេតុបានរត់គេចខ្លួនបាត់ បន្សល់ទុកតែគោយន្តនៅកន្លែង។ បច្ចុប្បន្ន វត្ថុតាងម៉ូតូ និងគោយន្តត្រូវបានត្រូវបានយកមករក្សាទុកនៅអធិការដ្ឋាននគរបាលស្រុកមង្គលបូរី រង់ចាំធ្វើការដោះស្រាយពេលក្រោយ។ ចំពោះករណីបង្កឲ្យកើតមានគ្រោះថ្នាក់ចរាចរណ៍នេះ គឺដោយសារតែអ្នកបើកម៉ូតូមិនគោរពសិទ្ធអាទិភាព៕
ចំនួនអ្នកទស្សនា
- ថ្ងៃនេះ2871
- ម្សិលមិញ11441
- សប្តាហ៍នេះ32701
- ខែនេះ147851
- ឆ្នាំនេះ147851
- សរុប20590307